Бүгін Республика көлемінде ҚР Президентінің кезектен тыс сайлауы өтуде. Осыған орай, таңғы сағат 7.00-ден бері Арыс қаласы бойынша 34 сайлау учаскесінде мемлекеттік әнұран шырқалып, ресми түрде ашылды.
Барлық сайлау учаскелері интернет, байланыс телефоны, бақылау камераларымен, қосымша электр көздерімен және арнайы басқа да құрал-жабдықтармен толық қамтылған.
Арыстықтар саяси науқанға таң атпай белсенділік танытуда. Алғаш келген сайлаушыларға арнайы кәдесыйлар да беріліп жатыр. Олардың қатарында зейнеткерлерден бастап, жұмысшылар, қала жастары және әскери қызметшілер бар.
Жалпы, Арыс қаласына қарасты 34 сайлау учаскесі бар. Арбамен жүретін адамдар кедергісіз қимылдау үшін барлық сайлау учаскесінде босағасы кең арнайы кабиналар орнатылған.
Арыс қаласы бойынша сайлаушылардың жалпы саны 44 349 адам болса, оның 2200-ден астамы мүгедектігі бар азаматтар. Барлық сайлау учаскілерінде зағип жандарға арналған аудио бюллетеньдер бар. Олар үміткерлердің тізімін қағаз бетін қолмен сипап оқи алады. Ал есту қабілетінде ақауы бар жандарға сурдоаудармашылар көмек қолын созып отыр.