Шымкентте полицейлер көші-қон заңнамасын түсіндіру бойынша студенттермен кездесу өткізді, — деп хабарлайды Jsk.kz ақпараттық агенттігі. Шымкент қаласы М. Әуезов атындағы ОҚМУ-да шетелдік студенттерге ҚР көші-қон заңнамасын түсіндіру бойынша кездесу өтті. Жиынға көші-қон қызметі басқармасы бастығының орынбасары Н.Сембаев, көші-қон қызметі басқармасының ерекше тапсырмалар жөніндегі аға инспекторы М.Медетбеков, Әл-Фараби АПБ көші-қон қызметі бөлімінің бастығы Е.Сапарбаев қатысып, шетелдік студенттердің елімізде болу тәртібін сақтауға байланысты маңызды мәселелерге тоқталды. Қазақстан Республикасының көші-қон заңнамасының негізгі ережелері, студенттік визаны ұзарту тәртібі, уақытша тіркеу талаптары және шетелдік азаматтардың құқықтары мен міндеттері туралы жан-жақты ақпарат берілді. Сонымен қатар кездесуде интернеттегі алаяқтықтан сақтану, әлеуметтік желілер арқылы есірткі таратудың қауіптілігі және өзге де құқық бұзушылықтар жөнінде ескерту жұмыстары жүргізілді. Осы орайда Президент, Құқық бұзушылықтың алдын алу жұмыстарын күшейту қажет екенін баса айтқан болатын. Оның айтуынша, қылмыс оған қолайлы жағдай жасаған жерде өршиді. Қылмыстың және заңға қайшы әрекеттердің салдарымен ғана күресуге болмайды. Қылмысқа түрткі болатын себептерді алдын ала анықтап, жойып отыру қажет.
– Менің тапсырмаммен «Құқық бұзушылықтың алдын алу туралы» заң жобасы әзірленіп, Мәжілістің қарауына берілді. Жаңа заң аталған саладағы мемлекеттік саясатты біріздендіріп, профилактикалық шаралармен қамтылатын тұлғалардың санатын кеңейтеді. Мұндай заң сөзсіз керек. Сондықтан мейлінше тез қабылдау қажет. Парламент депутаттарынан заң жобасын жылдың соңына дейін қарап, қабылдауды сұраймын. Заңнамалық өзгерістермен қатар, ұйымдық құрылымды да жаңғырту қажет. Ішкі істер министрлігі жүйесінде профилактикалық жұмыстарды үйлестіретін дербес бөлімше құратын уақыт келді. Құқық қорғау органдарының тиімділігін бағалау жүйесіне де өзгеріс қажет. Онда құқық бұзушылықты ескерту бағытындағы жұмыс нәтижесі есепке алынуға тиіс. Қылмысқа көбінесе тұрмысы нашар отбасыдан шыққан адамдар барады. Алдын алу шараларын жүзеге асырғанда дәл осы санатқа айрықша назар аударған жөн. Бұл ретте әлеуметтік қорғау органдары мен жергілікті билік маңызды рөл атқарады. Көптеген құқық бұзушылық ұқсас жағдайда, бірдей факторлардың әсерінен орын алады. Тиісті деңгейде талдау жасалса, оны дер кезінде ауыздықтауға болады. Басқаша айтқанда, қылмыс қаупін болжау және оған қарсы іс-қимыл жүйесін қайта қарау керек. Ол үшін Құқықтық статистика және арнайы есепке алу комитетінің әлеуетін толық пайдаланған жөн. Аталған ведомство жай ғана есеп сақтайтын орын емес, қоғамдық қауіпсіздік саласындағы қауіп-қатерді анықтайтын және ескертумен айналысатын орталық болуға тиіс, – деген еді Қасым-Жомарт Тоқаев.
Jsk ақпараттық агенттігі