Шымкент қаласының Наурыз алаңында республикалық Оркестрлер шеруінің салтанатты ашылуы өтті. Қала күніне орай 15 және 17 маусым күндері Наурыз алаңында еліміздің әр өңірінен келген классикалық, ұлттық және заманауи жанрдағы оркестр ұжымдары өнер көрсетеді.
Бүгінгі Оркестрлер шеруінің ашылу рәсіміне «Шымкент концерт» концерттік ұйымының Қазақ ұлт-аспаптар оркестрі мен Шымкент қалалық Опера және балет театрының симфониялық оркестрі қатысып, қала тұрғындарына керемет мәдени демалыс сыйлады.
17 маусым күні Құрманғазы атындағы Қазақ ұлттық халық аспаптар оркестрі, Сүйінбай атындағы Алматы облыстық филармониясының «Ақжауын» камералық оркестрі, Жамбыл атындағы Қазақ мемлекеттік академиялық филармониясының Қазақстан Республикасының Мемлекеттік үрмелі аспаптар оркестрі, Ғ.Құрманғалиев атындағы Батыс Қазақстан облыстық филармониясының Ш.Қажығалиев атындағы эстрадалық-симфониялық оркестрі, CDA Big Band джаз оркестрінің қатысуы жоспарланып отыр.
Шымкент қаласы әкімінің орынбасары Сәрсен Құранбек оркестрлер шеруі іс-шаралардың онкүндігі аясында өтіп жатқанын жеткізіп, қала тұрғындары мен қонақтарын керемет концерттерді тамашалауға шақырды.
Айта кетсек, республикалық Оркестрлер шеруін Шымкент қаласы әкімдігінің қолдауымен, Шымкент қалалық Мәдениет, тілдерді дамыту және архивтер басқармасы ұйымдастырды.