Заң мен тәртіп қағидаты барлық салада, әсіресе мемлекеттік органдарда үстем болуға тиіс. Жалпы, қоғам заңға бағынғанда ғана біз айтып жүрген құқықтық мемлекет қалыптаспақ. Азаматтардың заңға бағынуы олардың құқығын шектеу емес. Керісінше, тәртіпке бағынған қоғам өркениетті болады. Бұл мемлекеттің қауіпсіздігін нығайтып, демократияны дамыта түседі. Бүгінгідей күрделі геосаяси жағдайда елімізді сақтап қалу жолында азаматтардың мұны терең түсінгені ләзім. Өйткені заң үстем болмаған елде тұрақтылық болмайды. Ал тұрақтылық жоқ жерде сәйкесінше даму да болмайды. Жалпы, әрбір азамат өзін қауіпсіз сезіну үшін құқық қорғау жүйесі үйлесімді әрі тиімді жұмыс істеуі қажет. Сондықтан «Заң және тәртіп» қағидатын біржола орнықтыруда полиция айрықша рөл атқарады. Мемлекет басшысы Қ.Тоқаев полицияның сервистік моделінің негізгі қағидаттарын іс жүзінде жүзеге асыру қажет екенін айтқан болатын. Бұл, ең алдымен, қоғамның талап-тілегіне құлақ асып, шұғыл әрекет ете білу деген сөз.
– Халыққа ынтымақтастықтың өзара тиімді формасын ұсынып, кері байланыстың оңтайлы жолдарын реттеу маңызды. Бастамашыл және заңға қайшы әрекеттерге бейжай қарамайтын азаматтарға арқа сүйеу құқықбұзушылықтарға мүлдем төзбеушілік қағидатының іс жүзінде сақталуына мүмкіндік беретініне сенімдімін, – деді Президент. Құқық қорғау жүйесін толық реформалау, полициялардың түбегейлі өзгеруі – аса маңызды міндеттердің бірі. Президент полицияны қызмет көрсетуші органға айналдыруды жиі айтып келеді. Осы орайда Шымкентте полицейлер жол қозғалысы бойынша нұсқаулық кеңес өткізді, – деп хабарлайды Jsk.kz ақпараттық агенттігі. Жол-көлік оқиғаларының алдын алу және жеке құрамның қызметтік тәртіп деңгейін арттыру мақсатында нұсқаулық кеңес өткізілді. Кеңес барысында басшылық жол-көлік жағдайына баға беріп, жол апаттарының себептері мен оларға ықпал ететін факторларды талдады. Сондай-ақ полицейлердің жол қозғалысы кезінде және азаматтармен қарым-қатынаста қызметтік тәртіпті сақтауы мәселелеріне ерекше назар аударылды. Бөлім басшыларына профилактикалық жұмысты күшейту, патрульдеу тиімділігін арттыру және жол қозғалысы қауіпсіздігін қатаң бақылауға алу бойынша нақты тапсырмалар берілді. Мұндай шаралар полиция департаментінде тұрақты түрде өткізіліп келеді.
Jsk ақпараттық агенттігі