Жеті ай бұрын Shymkent Hub пен Назарбаев Зияткерлік мектебі арасында өзара ынтымақтастық туралы меморандумға қол қойылған болатын. Бұл келісімнің басты мақсаты – балаларға сапалы робототехника білімін беру және олардың халықаралық деңгейде бәсекеге қабілеттілігін арттыру болды.
Осы уақыт ішінде Shymkent Hub резиденті RoboPark орталығы тәжірибелі жаттықтырушылармен бірлесе отырып, оқушыларды даярлау бағытында ауқымды жұмыс атқарды. Нәтижесінде Назарбаев Зияткерлік мектебінің оқушылары Нәбиев Рамазан мен Хусан Аян RoboStorm командасының құрамында қалалық іріктеуден сәтті өтіп, республикалық кезеңге жолдама алды. Бұл жолда олардың жаттықтырушысы Айдарәлі Мағжан жетекшілік етті.
Республикалық чемпионатта RoboStorm командасы екінші орын иеленіп, оқу-жаттығу жиынына қатысу мүмкіндігін алды. Аталған жиын 25–29 тамыз күндері Астана қаласында өтті. Мұнда еліміздің ең үздік командалары күрделі тапсырмаларды орындап, өзара бақ сынасты.
Жаттығу жиыны қорытындысы бойынша RoboStorm командасы бірінші орынды иеленіп, халықаралық кезеңге жолдама алды.
Енді Аян мен Рамазан Сингапур қаласында 26–28 қараша күндері өтетін әлемдік финалда Қазақстан атынан өнер көрсетеді.
Бұл жеңіс – RoboPark орталығының жүйелі еңбегі мен оқушылардың табандылығының нәтижесі.