«Мен бақытты болуға лайықтымын» атты атаумен ұйымдастырылған бұл жиын әйелдердің құқықтарын қорғауға, психологиялық көмек көрсетуге және отбасындағы зорлық-зомбылықтың алдын алуға бағытталды. Іс-шараның негізгі ұйымдастырушылары – Шымкент қаласы Полиция департаментінің Тұран аудандық полиция басқармасы мен арнайы мақсаттағы бөлімшелер. Бұл бастама қазіргі қоғамда өте өзекті болып отырған тұрмыстық зорлық-зомбылық мәселесіне назар аударып, оның тамырын тереңнен тартуға тырысты. Спикерлер зорлық-зомбылық құрбаны болған немесе қауіп төніп тұрған әйелдерге не істеу керектігін, кімге жүгінуге болатынын және қандай құқықтары бар екенін түсіндірді. Сонымен қатар, тұрмыстық зорлық-зомбылықтың әртүрлі түрлері – физикалық, психологиялық, экономикалық және жыныстық зорлық жайлы кеңінен сөз қозғалды. Қатысушылармен интерактивті форматта пікір алмасу өтті, нақты өмірден алынған мысалдар келтіріліп, заң шеңберінде қорғану жолдары талқыланды. Іс-шараға қатысқандар қатарында полиция аға лейтенанты Қиюбек Наргиза Жадетқызы, полиция капитаны Көбей Гулида Әсілбекқызы, полиция аға лейтенанты Анарбай Айжан Ғанимұратқызы және психолог, гештальт терапевт, философия ғылымдарының PhD докторы Асанова Салтанат Сайлауқызы болды. Олар әйелдермен ашық әңгіме жүргізіп, психологиялық қолдау көрсетіп, тұрмыстық зорлық-зомбылық туралы нақты құқықтық және тәжірибелік ақпаратпен бөлісті. Мұндай іс-шаралар Шымкент қаласында бұған дейін де бірнеше рет өткізілген. Мәселен, «Зорлық-зомбылықсыз отбасы» атты акциялар арқылы қаланың әр ауданында полиция мен үкіметтік емес ұйымдар бірлесіп тұрғындармен кездесіп, ақпараттық түсіндіру жұмыстарын жүргізген болатын. Бұл шаралардың басты мақсаты – қоғамда зорлық-зомбылыққа төзбеушілік көзқарасын қалыптастыру, отбасы құндылықтарын дәріптеу және әйелдердің құқықтық сауаттылығын арттыру болды. Психолог Салтанат Асанова қатысушылармен арнайы психологиялық жаттығулар жүргізіп, өз-өзіне сенімділік арттыру, ішкі күйзелістерді жеңу және шекара қою секілді өмірлік маңызды дағдыларды үйретті. Ол әйелдің ең алдымен жеке тұлға екенін, оның өмір сүруге, бақытқа, қауіпсіздікке құқығы бар екенін ерекше атап өтті. Бұл қатысушыларға үлкен шабыт беріп, көптеген әйелдердің көкейінде жүрген сұрақтарға жауап алуға мүмкіндік берді. Сол сияқты биылғы қаңтар айында қалада бірнеше күн бойы тұрмыстық зорлық-зомбылықтың алдын алу бойынша түсіндірме жұмыстары жүргізілді. Бұл шара барысында құқық қорғау органдары халықпен кездесу өткізіп, арнайы буклеттер мен ақпараттық материалдар таратты. Қалалық прокуратура мен ішкі істер органдары да бұл мәселеге ерекше назар аударып, заң қолдану тәжірибесін жетілдіру бағытында жұмыс істеді. Жоғары деңгейдегі талқылау алаңдарында отбасы ішіндегі кикілжіңдердің алдын алу жолдары, әйелдер мен балалардың құқығын қорғау мәселелері күн тәртібіне шығарылды.
Jsk ақпараттық агенттігі