Қазіргі таңда нашақорлық мәселесі бүкіл әлем елдерін алаңдатып отырған өзекті проблемалардың бірі болып отыр. Бұл дерт тек белгілі бір топты немесе жекелеген аймақтарды ғана емес, тұтастай қоғамды улайтын, ұлттық қауіпсіздікке, ұрпақ денсаулығына, мемлекеттің болашағына тікелей әсер ететін қауіпті құбылысқа айналған. Әсіресе жасөспірімдер арасында есірткінің алдын алу жұмыстары басты назарда, себебі мектеп жасындағы балалар түрлі қызығушылыққа беріліп, қауіпті әдеттердің ықпалына оңай түсіп кетуі мүмкін. Осы тұрғыдан алғанда, Шымкент қаласы Полиция департаментінің қызметкерлері Тұран зияткерлік мектебінде «Есірткінің зияны мен зардаптары туралы» атты арнайы кездесу ұйымдастырды. Кездесудің басты мақсаты – жасөспірімдерге есірткінің адам денсаулығына, психикасына, болашағына тигізетін кері әсерін түсіндіру және оларды салауатты өмір салтына бағыттау болды. Шараға Есірткі қылмысына қарсы іс-қимыл басқармасының аға жедел уәкілі, полиция майоры Қыдыр Алмас арнайы қатысып, жасөспірімдерге жан-жақты түсініктеме берді. Ол өз сөзінде қазіргі таңда жасөспірімдер арасында жиі кездесетін мәселелерге тоқталып, зиянды әдеттердің қысқа уақыттық «құмарлықтан» гөрі ұзақ мерзімді қайғы-қасірет әкелетінін нақты мысалдар арқылы жеткізді. Оқушыларға есірткінің физиологиялық және психологиялық зардаптары жайлы толыққанды ақпарат берілді. Психоактивті заттарды тұтынудың салдары ретінде жүрек, бауыр, ми қызметінің бұзылуы, оқу үлгерімінің төмендеуі, отбасылық қарым-қатынастың нашарлауы, қылмыстық әрекеттерге бару қаупі туралы жан-жақты түсіндірілді. Полиция майорының айтуынша, жастардың есірткіге әуестенуінің негізгі себептері – қызығушылық, достардың ықпалы, интернет пен әлеуметтік желілердегі теріс ақпараттың әсері және бос уақытты дұрыс ұйымдастырмау. Сондықтан да жасөспірімдер әрбір сәтте өз таңдауының салдарын түсініп, кез келген қауіпті ұсыныстан бас тарта білуі қажет. Кездесуде оқушыларға нақты мысалдар келтіріліп, нашақорлыққа салынған адамдардың өмірлік жағдайлары айтылды. Бұл оқиғалар балалардың есінде сақталатындай етіп жеткізілді. Сонымен қатар, оқушыларға күнделікті өмірде кездесетін күдікті жағдайларды елемей қоймай, бірден ата-аналарына немесе құқық қорғау органдарына хабарлау қажеттігі түсіндірілді. Кездесу барысында оқушыларға тек ескерту жасалып қана қоймай, оларға баламалы дұрыс бағыт ұсынылды. Яғни спортпен шұғылдану, шығармашылық үйірмелерге қатысу, ғылым мен білімге қызығушылық таныту сияқты пайдалы әдеттерді қалыптастырудың маңызы ерекше аталып өтті. «Салауатты өмір салты – жарқын болашақтың кепілі. Егер әр жасөспірім өз уақытын тиімді пайдаланса, спортпен немесе өнермен айналысса, ол ешқашан зиянды әдеттердің жетегіне ермейді», – деп атап өтті Қыдыр Алмас. Шара барысында құқықтық сауаттылық мәселесі де қозғалды. Полиция өкілі есірткі заттарын тұтыну, сақтау немесе тарату заң бойынша қатаң жазаланатынын түсіндірді. Бұл қылмыс түрі адамның тек өзіне ғана емес, айналасына да үлкен қауіп төндіретіні айтылды. Сонымен бірге, оқушыларға психологиялық тұрғыдан қолдау көрсетілді. Жасөспірімдер өз ойларын ашық айтуға мүмкіндік алды, сұрақтар қойып, толыққанды жауаптар алды. Кездесу соңында оқушылар мен полиция қызметкерлері арасында кері байланыс орнатылып, ашық әңгіме жүргізілді. Бұл шараның мәні тек бір мектеп оқушыларымен кездесумен шектелмейді. Ол бүкіл қоғамға үлгі болатын іс-шара. Өйткені нашақорлықтың алдын алу – тек полицияның ғана емес, әрбір ата-ананың, әрбір мұғалімнің, тіпті бүкіл қоғамның ортақ міндеті. Жастарды зиянды әдеттен сақтау үшін отбасы, мектеп, қоғам болып бірлесіп жұмыс істеу қажет. Тұран зияткерлік мектебінде өткен бұл кездесу жасөспірімдер үшін маңызды әрі пайдалы болды. Оқушылар есірткінің зияны туралы нақты әрі сенімді ақпарат алып, өз ойларын ортаға салды. Мұндай шаралар жас ұрпақтың санасына дұрыс құндылықтарды сіңіруге ықпал етеді. Қоғам болашағы – жастардың қолында. Сондықтан әрбір жасөспірімнің қауіпсіздігі мен денсаулығын сақтау – басты міндетіміз. Бүгінгі түсіндіру жұмыстары олардың есінде сақталып, дұрыс жолды таңдауға септігін тигізетіні анық.
Jsk ақпараттық агенттігі