Шымкент қаласы қоғамдық кеңесі 2022 жылдан бастап қазіргі таңға дейін белсенді жұмыс істеп, қаладағы әртүрлі мәселелерді шешуге және азаматтардың өтініштерін тиімді қарауға үлкен үлес қосты. Кеңестің құрылымы мен жұмыс бағыты әртүрлі әлеуметтік мәселелерді қамтып, қала тұрғындарының өмір сапасын жақсартуға бағытталған бірнеше маңызды қадамдарды жүзеге асырды.
Қоғамдық кеңестің алғашқы міндеті — Шымкент қаласының әлеуметтік-экономикалық жағдайын жақсарту мен азаматтардың құқықтары мен мүдделерін қорғау болды. 2022-2025 жылдар аралығында 43 жиын өткізіліп, онда 90 мәселе қаралып, 350-ге жуық хаттамалық ұсынымдар мемлекеттік органдарға жолданды. Кеңес жұмысына қала әкімдігіне қарасты 28 басқарманың, жергілікті 5 құқық қорғау органының басшылары мен мемлекеттік қызметкерлері үнемі қатысып отырды. Сонымен қатар, қоғамдық кеңес өз жұмысында маңызды әрі өзекті мәселелерді шешу үшін түрлі салаларға қатысты пікір алмасып, тиісті шаралар қабылдады. Кеңестің жұмысына қатысты бірнеше маңызды жетістіктер мен қадамдарды атап өтуге болады. Мысалы, «Қызылжар» тұрғын алабында тұратын 148 тұрғынның өтініші негізінде магистралды жолдың бағытын өзгерту сұранысы қаралып, тиісті өзгерістер бас жоспарға енгізілді. Ал Шымкент қаласының тұрғыны Р.Абдукапарованың тұрғын үй кезегінен заңсыз шығарып тастаған мәселесі бойынша кеңес мүшелері оның қайта кезекке тұруына және үйлі болуына ықпал етті. Сондай-ақ, кеңес мүшелері қаладағы жол қауіпсіздігін арттыру мақсатында Назарбеков көшесіндегі жол белгілерінің дұрыс орналастырылуына назар аударып, Жол басқармасы мен ІІ департаменті өкілдерімен бірге мәселені шешу үшін жұмыс жүргізді.
Қоғамдық кеңес экологиялық мәселелерді де назардан тыс қалдырған жоқ. Мысалы, қала аумағындағы қоқыс тазалау жұмыстарын бақылап, «Таза Қазақстан» республикалық акциясы аясында қаланың бірнеше жерінде эко-бақылаулар жүргізілді. Сонымен қатар, қаладағы жылу беру маусымына дайындық, қоршаған ортаның жай-күйі, сонымен қатар орта және кіші кәсіпкерлердің төлейтін салықтарын төмендету бойынша да ұсыныстар жасалып, қала әкімдігінің қолдауымен іске асты. Кеңес мүшелері қаладағы білім беру саласын жақсарту бойынша да бірқатар ұсыныстар енгізіп, балалардың қауіпсіздігін қамтамасыз ету мақсатында маңызды өзгерістерді жүзеге асырды. Мысалы, қаладағы мектептер мен балабақшалардың жағдайы бақылауға алынып, көптеген оң өзгерістер енгізілді. Сонымен қатар, балалар арасындағы суицид мәселесін көтеріп, осы бағытта арнайы комиссия отырысы өткізіліп, психологиялық қолдау жұмыстарын күшейту туралы ұсыныстар жасалды. Қоғамдық кеңес жұмысының ашықтығы мен жариялығы да маңызды орын алады. Кеңес отырыстары үнемі БАҚ өкілдерінің қатысуымен ашық түрде өткізілді. Қоғамдық кеңес мүшелері тұрақты түрде халықпен кездесіп, олардың өтініштеріне дер кезінде жауап беруге тырысты. Әлеуметтік желілерде де белсенді жұмыс жүргізіліп, тұрғындарға кеңес жұмысының нәтижелері мен оның тиімділігі туралы ақпараттар берілді.
Шымкент қаласының қоғамдық кеңесі өз жұмысында қаланың дамуына және оның тұрғындарының өмір сапасын жақсартуға бағытталған маңызды қадамдарды атқарып келеді. Кеңес мүшелерінің белсенді қатысуы мен халыққа ашық болуының арқасында қаладағы көптеген мәселелер уақытылы шешіліп, көптеген әлеуметтік жобалар жүзеге асырылды. Осылайша, қоғамдық кеңес Шымкент қаласы тұрғындарының мүдделерін қорғау мен олардың құқықтарын қамтамасыз ету жолында маңызды рөл атқарып келеді.
Бұл туралы Шымкент қаласының Өңірлік коммуникациялар қызметі ақпарат алаңында сөз сөйлеген, Шымкент қаласы қоғамдық кеңесінің III шақырылымының төрағасы — Әлтеев Бауыржан Ілімшаулы мәлімдеді
Толығырақ: https://www.youtube.com/live/46y15X61Yng?si=k2otNus5dhJXl7B2
#РСКШЫМКЕНТ #БРИФИНГ