Ата-бабамыз кейінгі ұрпағына аманаттап қалдырып кеткен еліміз бен кең-байтақ жерімізді қызғыштай қорғап, тыныштығын сақтап, Мәңгілік ел болу жолындағы қастерлі міндетіміздің биігінен көрініп, қорғанысымызды нығайтып, күш-қуатымызды барынша еселей түсудің аса жауапты шағы өтуде. Туған жер мен Отанға деген ұлы сүйіспеншілік болған жерде кез келген қауіп-қатерге бүгінгі ел қорғаушылары тойтарыс беретіндігіне кәміл сенемін. «Мен Отанымды ұлы болғаны үшін сүймеймін, өзімдікі болғаны үшін сүйемін» деген қазақтың даңқты батыры Бауыржан Момышұлының осы сөзіне лайықты жас ұландарымыз көз ілмей ел күзетінде жауынгерлік міндеттерін мінсіз атқарып, берген анттарына адалдық танытып жүргендерін айту парыз. Әскери техникамыз бен құрал-жабдықтар жылдан-жылға жаңарып, күш-қуатымыз мейлінше артып келеді. Қарулы Күштеріміздің нысандары заманауи әскери техникамен жабдықталып, әскер құрамы білімді де білікті мамандармен толықтырылған. Осы орайда 7 қарашада Шымкентте орналасқан ҚР ІІМ Ұлттық ұланы 6506 әскери бөлімінің саптық алаңында 2-2023 шақырылым сарбаздарына тегін негізде жоғары оқу орнына түсу туралы сертификаттар салтанатты түрде табыс етілді. Айта кету керек, Шымкент жедел бригадасының 400-ге жуық әскери қызметшісі бағалы сертификаттар алуға үміткер болды. Тек 38-і ғана жоғары оқу орындарына түсуге мүмкіндік алды. 6506 әскери бөлімінің командирі полковник Марат Рахпанов өз сөзінде: «Біз әскери қызметшілеріміздің жеке және кәсіби өсуіне барлық жағдай жасауға тырысамыз. Білім беру гранттарын тапсыру — бұл біздің сарбаздарымызға жоғары білікті маман болуға және елдің дамуына үлес қосуға мүмкіндік беретін болашаққа салынған инвестиция» — деді ол. Грант алушылардың бірі, қатардағы жауынгер Мақсат Тоқтасын өз әсерімен бөлісті: «Мен әрқашан жоғары білім туралы армандайтынмын. Бұл грант мен үшін өз амбицияларымды жүзеге асыруға және қажетті біліммен еліміздің дамуына үлес қосуға тамаша мүмкіндік». Тегін білім беру гранттары әскери қызметшілерді қолдауға бағытталған мемлекеттік бағдарламаның бөлігі болып табылады. Мұндай бастама сарбаздар арасындағы білім деңгейін арттырып қана қоймай, олардың елге одан да адал қызмет етуге деген ынтасын арттырады. Естеріңізге сала кетейік, мерзімді әскери қызметтен өткен сарбаздар осы сертификаттармен ЖОО-ға екі жыл ішінде түсе алады.
Jsk ақпараттық агенттігі