Қазақстан Республикасы президенттігіне кандидат Мейрам Қажыкен «Дипломмен ауылға» бағдарламасының тиімсіздігін атап өтті. Бұл туралы Қаскелең қаласының педагогтерімен болған кездесуде айтылды.
Мейрам Қажыкен жас мұғалімдерге бөлінетін қаражат жеткіліксіз болғандықтан мамандар қалаға қайтып кететінін жасырмады. «Мен бұл мәселемен таныспын. Жастар екі жылға келеді, қиындықтарға тап болады, шыдамайды, сосын кетеді. Тұрғын үй және жалақы мәселесі шешілмейді. Бұл үдерісті үкімет нашар бақылайды. Егер біз жас мамандарды, дәрігерлерді, бухгалтерлерді, мұғалімдерді ауыл-дық жерлерде қалдырғымыз келсе, бағдарламаны қайта қарап, жетілдіруіміз қажет», деді кандидат. Үміткер мамандардың жетіспеу-шілігі адамдардың өміріне және жалпы өңір экономикасына теріс әсер ететінін еске салды.
Ал Алматыда ұйымдастырылған дөңгелек үстелде жұмыс берушілер мен кәсіподақтардың өкілдері «Атамекен» Ұлттық палатасына балама ұйым құру туралы бастама көтерді. Отырысқа қатысушылардың айтуынша, кәсіпкерлер ұлттық палатаның кейбір әрекеттеріне наразы. Сондықтан көп азамат үшін жұмыс беруші болып табылатын бизнестің мүдделерін қорғау жөніндегі жаңа орган құру туралы мәселе туындады. Талқылау нәтижесінде тараптар екіжақты әлеуметтік әріптестік алаңын дамыту туралы шешім қабылдады.